වියෝගය

වලාවන් මත ගොතා සළුවක් වියාගත් සුසුමින්

දරාගත් මහමෙරක් දුක් කඳ අතුරලා රහසින්

බලාගත් අත බලාඋන්නට ඉනාවක් විලසින්

හදේ පුංචිම තැනත් වැළපෙයි ඔබ නිසා රහසින්

ඈත ඉගිලෙන සියොතුනේ නුඹ මැවු රටා අහසේ

පෙනේවිද ඔහුටත් වගේ මට හුදෙකලා සටනේ

ලියා පණිවිඩයක් සලා තටු මකාපන් රහසේ

කුමට පණිවිඩ නොලැදි සිතකට නොහඬපන් කඳුලේ

සුළඟ මදකට නතර වීයන් හනික යන ගමනේ

සුවඳවත් නුඹ අරන් ආවද මතකයන් මැඳුරේ

අනේ මොකටද මතකයන් ඒ විඳවනා මහදේ

හනික පලයන් මගේ තනිකම මම විඳිමි සුහදේ

- චූලා -